heimspekismiðja

Archive for nóvember, 2013|Monthly archive page

Er líf án trúarbragðanna eitthvað líf?

In Uncategorized on nóvember 30, 2013 at 11:27 e.h.

Endurmenntunarstofnun Háskóla íslands stendur á vormisseri fyrir námskeiðinu Er líf án trúarbragðanna eitthvað líf? Í námskeiðslýsingu segir m.a.:

Fjallað er á gagnrýninn hátt um ýmis álitamál Húmanismans eins og þau koma fyrir í bók Richard Norman Um húmanisma. Húmanismi er stefna sem sækir hugmyndir sínar til ýmissa heimspekinga allt frá Grikklandi til forna s.s. Sókratesar, Platons og Aristótlesear til síðari tíma heimspekinga eins og John Stuarts Mills, Bertrand Russells og Jean – Paul Sartres.

Húmanisminn leggur áherslu á manninn, möguleika hans og ábyrgð á eigin lífi í veröld þar sem ekkert er víst um guð. Á námskeiðinu verður stuðst við bók Richard Norman Um húmanisma (Ormstunga 2012). Þátttakendur lesa bókina en í stað þess að rekja innihald bókarinnar á námskeiðinu mun kennari draga fram ýmis álitamál og verða þau skoðuð með gagnrýnu hugarfari og rökrædd. Um er að ræða heimspekilega málstofu þar sem mikið er lagt upp úr gagnrýninni nálgun þátttakenda á viðfangsefnið og heimspekilegum samræðum.

Á námskeiðinu er fjallað um:

• Er eitthvað sérstakt við það að vera manneskja?
• Er hægt að lifa tilgangsríku lífi án trúarbragðanna?
• Hefur guð eitthvað að gera með siðferðið?
• Má hver gera það sem hann vill við sjálfan sig?
• Hver er hlutur gagnrýninnar hugsunar, rökræðu, siðfræði og mannréttinda í húmanismanum?
• Á húmanisminn erindi í nútímasamfélagi?

Námskeiðið er fyrir alla sem áhuga hafa á hugmyndasögu, heimspeki og siðfræði. Ekki eru gerðar kröfur um menntun eða reynslu.

Kennari(ar):

Jóhann Björnsson er með MA próf í heimspeki frá Katholieke Universiteit Leuven í Belgíu. Hann hefur í mörg ár kennt heimspeki og siðfræði á unglinga – og framhaldsskólastigi og er sérstaklega áhugasamur um að kynna heimspekina og aðferðir hennar almenningi. Jóhann hefur gefið út eina bók Eru allir öðruvísi? Fjölmenning og heimspeki.

Nánari upplýsingar má finna á eftirfarandi vefslóð:

http://www.endurmenntun.is/Namskeid/Fyrirthig/Skoda/5V14

Auglýsingar

Dagur heimspekinnar 2013

In Uncategorized on nóvember 24, 2013 at 2:08 e.h.

Tuttugusta og fyrsta nóvember ár hvert er alþjóðlegur dagur heimspekinnar. Það var UNESCO sem hafði frumkvæði að því að halda upp á daginn og var það fyrst gert árið 2005.  Með degi heimspekinnar er verið að hvetja til að gera heimspekinni og áherslum hennar hærra undir höfði t.d. með málfundum, sýningum og upplýstri , gagnrýninni og lýðræðislegri samræðu.

Í ár var í fjórða sinn haldið upp á daginn við Réttarholtsskóla, en við skólann stunda um eitt hundrað og þrjátíu nemendur heimspeki í vetur. Sem fyrr varð svokölluð „veggspeki“ fyrir valinu en það þýðir að nemendur sýna hugverk sín á veggjum skólans. Þar mátti finna ógrynni heimspekilegra spurninga, svara við spurningunni „hvað er ást?“ og bókin Palli var einn í heiminum endurskrifuð sem  heimspekibók.

Nánar má lesa um dag heimspekinnar á vef UNESCO

http://www.unesco.org/new/en/social-and-human-sciences/themes/philosophy/philosophy-day-at-unesco/

CIMG2313CIMG2311CIMG2319CIMG2322CIMG2318CIMG2315 CIMG2316

%d bloggurum líkar þetta: